Ítróttarfelagið Argir leitar eftir einum nýggjum høvuðsvenjara til næsta kappingarár. Í felagnum eru nærum allir aldursbólkar, frá minihondbólti til U16.

Argir er í eini stórari menning har barnafamiljurnar leggjast afturat í stórum tali. Okkara mál er, at hondbólturin gerst eitt natúrligt val fyri øll børn á Argjum. Sum liður í hesum arbeiði er tað ætlan felagsins at fáa alla ungdómsdeildina í eina legu, har felagið fast er umboðað í øllum aldursbólkum við minst einum liðið. Fyri at røkka hesum hevur felagið seinastu árini haft fulltíðarsettan ungdómsvenjara, sum hevur verið ein savnandi og sentralur persónur í felagnum.

Av tí at okkara venjari hevur leitað sær nýggjar leiðir uttanlands, leita vit eftir einum royndum ungdómsvenjara at taka yvir venjingina í einum felag í stórari menning. Felagið vil, at góða menningin skal halda fram og at vit í longdini eisini fara at gera okkum galdandi í vaksnamannadeildunum. Hesum arbeiðinum gerst nýggi venjarin ein týðandi partur av. Sum nýggjur venjari sleppur tú í tøttum samstarvi við starvsnevnd felagsins at seta tíni egnu fingramerki á víðari menningina.

Vit vænta, at tú kanst røkja starvið sjálvstøðugt og ábyrgdarfult við ágrýtni.

Arbeiðið kemur at fevna um:

• Dagligu venjingina av liðunum saman við hjálparvenjarum.
• Samskipan av heima- og útidystum.
• Samskipan av skeiðum í venjing, døming o.l fyri hjálparvenjarar, foreldur og onnur, ið eru knýtt at liðunum.
• Saman við nevndini at fyriskipa tiltøk, sum eru við til at menna felagið.

Løn verður avtalað í mun til útbúgving og royndir.

Nærri fæst at vita við at venda sær til Sunrid í Gong, Forkvinnu, tlf. 501000 ella sunridgong@gmail.com

Umsókn við CV og møguligum viðmælum skal sendast til itrottarfelagid.argir@gmail.com og vera felagnum í hendi seinasta lagið 20.04.2022. Merk teldupostin “Høvuðsvenjari”.

Ársaðalfundurin í ÍA verður 16. desembur kl. 19 í skúlanum á Argjahamri, fundurin verður hildin í lærarastovuni. Øll eru vælkomin. Kunning verður um virksemi í felagnum. Eisini er møgiligt at stilla upp til nevndina.

Felagið, sum í ár kann halda 10 ára stovningardag, hevur verið ígjøgnum eina stóra menning.

Hetta merkir sjálvsagt, at fleiri nýggir limir og teirra foreldur eru løgst til, og tí er aðalfundurin eitt gylt høvi, at koma saman við øðrum limum og nevnd felagsins og har fáa kunning um felagið.

Felagið er, hóast 10 ár á baki, enn í eini uppbyggingartíð har størsti, um ikki allur, denturin verður lagdur á barna- og ungdómsliðini. Tí er tað framhaldandi av størsta týdningi, at foreldur eru virkin og luttakandi í felagsarbeiðinum. Aðalfundurin er í tí sambandi staðið, har øll fáa høvið til at bjóða seg fram í felagsarbeiðinum. Tað kann vera luttøka av øllum slag: Hjálp til venjingar, hjálp til dystir og kappingar bæði úti og heima, skipan av trivnartiltøkum ella øðrum tiltøkum. Alt er vælkomið.

Sjálvsagt ber eisini til at stilla upp til nevndina. Hetta kann kanska tykjast møtumikið, hóast hugurin er til tað. Setist kortini ikki aftur, men setið tykkum tá í samband við onkran í nevndini, sum fegin vilja greiða frá verandi nevndararbeiðinum.

1. Val av fundarstjóra
2. Formaðurin greiðir frá farna árið
3. Kassameistarin leggur fram grannskoðaðan roknskap
4. Innkomin mál
5. Nevndarval
6. Ymiskt

Hey øll somul !

Vit hava ætlað okkum at bjóða tykkum til ein hugna og lima dag í samband við at felagið bleiv 10 ár í august. Men soleiðis sum støðan er nú viðvíkjandi korona eru útlitini ikki góð fyri, at vit kunnu samlast í skúlanum áðrenn jól.

Tí hava vit avgjørt at gera ein online tilmeldingardag, har øll tit, sum hava goldið limagjald seinast týsdagin 09. nov. kl. 18.00 fáa ein pakka koyrdan heim.

Soleiðis gert tú

Útfyll upplýsingarnar á tilmeldingarsíðuni, skriva stødd av limablusu í viðmerkingarteigin og flyt síðani fyri limagjald á konto felagsins 9865-305.807.1. Viðmerkjast skal navn á íðkara og heiti á liðnum, ið íðkarin er meldaður til. Send kvittan fyri limagjaldi til itrottarfelagid.argir@gmail.com

Pakkin frá okkum

Pakkin vit koyra út til tín inniheldur

• Limablusu
• Hálsrør
• Avsláttarseðil, ið gevur tær -20% tá tit keypa ÍA trenisdraktina frá Thomas Dam Intersport
• Okkurt gott aftrat

Vit gleða okkum at koyra pakkan út til tykkum.

Á seinasta kappingardegi tryggjaðu okkara dreingir U14 sær gull í B-bólkinum 20/21

Tann 23. mars varð avgerandi dysturin leiktur í høllini á Argjahamri móti STÍF. Tað var krav at okkara dreingir vunnu dystin, um gullið skuldi takast út á Argir.

Dreingirnir lótu ongan iva vera um at hetta eisini var teirra greiða ætlan. Við einum 5 máls sigri løgdu teir eitt ómøguligt trýst á STÍF og H71, sum við sigrum vikuskiftið eftir kundu gerast javnir við ÍA í stigum. Men H71 skuldi vinna sín dyst móti Team Klaksvík við fleiri enn 23 málum og STÍF skuldi tá vinna sín dyst móti KÍF við fleiri enn 39 málum. Hóast gullið sostatt tóktist at vera komið í hús, er tað einn sannroynd at einki er liðugt fyrr enn alt er liðugt. Men tá so H71 einans megnaði javnleik og STÍF einans vann við 5 málum, so gjørdist tað víst, at ÍA Dreingir U14 eru gullvinnarar í bólki B kappingarárið 20/21.

Hesir somu dreingirnir vístu eisini sínar dygdir í steypafinaluni, har teir fingu silvurmerki. Hetta er ein góður árgangur hjá felagnum og vit gleða okkum at síggja, hvussu hesir fara at mennast.

Vit ynska dreingjum U14 og venjarum hjartaliga til lukku við sigrinum.

Gentur 12 vóru um reppi at vinna sær silvurmerkini í bólki c í ársins seinasta kappingarumfari.

Seinasta kappingarumfarið fyri genturnar var í Klaksvík 27. mars. Her kundu genturnar tryggja sær silvurmerkini við at vinna á Stjørnuni á heimavølli og VB.

Tær løgdu sera væl út og vunnu á klaksvíksgendunum á teirra heimavølli ein tepran 10-9 sigur, men hetta hevur helst kravt ov mikið av megi úr teimum til eisini at knógva vágbingunum, sum undan hesum dystinum høvdu møtt væl lættari mótstøðu. Endin var ein sigur til VB á 13-10, sum gav teimum sivurmerkini i staðin.

So mikið var kortini stríðst, at endin av kappingini 20/21 var at Stjørnan endaði á odda við 32 stigum, meðan bæði ÍA og VB høvdu 29 stig. Her hevði VB tó munin í málúrtøkuni.

Tað sigur tó ikki so lítið, at okkara gentur syftu oddaliðnum á teirra heimavølli og vit ynskja teimum hjartaliga til lukku við heiðursmerkjunum. Tað verður spennandi at fylgja hesum røsku gentunum í komandi tíðum.

Í dag var sáttmáli undirskrivaður við Anders Risdal at vera høvuðsvenjari fyri ÍA kappingarárið 2021/2022

Nú kappingarárið 2020/2021 er farið at halla, er tað okkum ein gleði at kunngera, at tað verður Anders Risdal, sum kemur at taka yvir eftir Mark Dahl sum høvuðsvenjari.

Tað skulu stórir føtur til at fylla út skógvarnar eftir Mark, sum eftir hetta kappingarárið fer víðari til avbjóðingar sum venjari í Noregi. Tí er gleðin enn størri, at tað júst er Anders, sum tekur yvir.

Anders er eitt kent andlit millum børn og ung her á Argjum. Hann hevur seinastu árini starvast í Frítíðarskúlanum á Argjahamri og í Argjaskotinum. Harumframt hevur hann verið venjari hjá U12 dreingjum hjá Kyndli, har hann sjálvur eisini leikar í Burn deildini.

Hann hevur útbúgvin námsfrøðingur og hevur drúgvar royndir innan barna- og ungdómsítrótt í Danmark.

Stóru og nógvu lógvabrestirnir, ið vóru at hoyra í høllini á Argjahamri í dag, tá sáttmálin var undirskrivaður, bera boð um at tað ikki einans er nevndin, sum fegnast um at hava fingið Anders til ÍA.

Felagið er í stórum vøkstri, og saman við Anders er gott grundarlag lagt fyri at hesin vøkstur kann halda fram. Saman fara vit at byggja víðari á góða grundarlagið, sum er undir felagnum, har úrslit og trivnaður ganga hond í hond.

Dreingir 10 vunnu gull, dreingir 12 stríddust væl og dreingir 14 leiktu helst mest spennandi dystin av øllum.

Vit vilja takka fyri eitt gott vikuskifti uppi í høllini á Nabb, takk til allar stuðlarnar, sum komu niðan at heppa, uttan tykkum var tiltakið ikki líka gott.

Dreingir 10 góvu okkum eina spennandi byrjan, har neyðugt bleiv við øktari leiktíð og vunnu vit gull og dagsins leikari var Jónas Sigtórsson.

Dreingir 12 spældu ein fínan dyst, teir komu ikki so væl frá byrjan, men vunnu seg nógv fram í seinna hálvleiki og mistu ikki mótið. Vit ivast ikki í, at koma at síggja teir aftur til steypafinaluna næsta ár og tað gleða vit okkum til

Sunnudagin spældu D14 í móti Stíf, tað var ein ordiligur gysari fyri okkum áskoðarir, við dupultari eyka leiktíð taptu teir við tveimum málum, men vit fingu dagsins leikara, sum gjørdist Heðin Olsen.

Vit í felagnum eru stolt av tykkum øllum og vilja somuleiðis takka HSF fyri at hava givið B- finalunum sama pláss og virði sum A finalurnar.